O Concello de Boborás levará a cabo a primeira fase das actuacións de integración paisaxística, mellora funcional e accesibilidade na contorna da igrexa de San Martiño de Cameixa, no lugar de Morouzón, unha intervención que busca poñer en valor un dos espazos patrimoniais máis singulares do municipio.

A actuación desenvolverase ao abeiro dun convenio de colaboración entre a Axencia de Turismo de Galicia e o Concello de Boborás, cun orzamento de 129.979,77 euros e unha achega máxima de 117.000 euros por parte da Axencia de Turismo de Galicia.

Boborás é un dos concellos con maior riqueza patrimonial de Galicia, e esta intervención forma parte da liña de traballo municipal orientada á conservación, recuperación e posta en valor do patrimonio local, tanto para o desfrute da veciñanza como para reforzar o atractivo turístico do municipio.

A igrexa de San Martiño de Cameixa é un dos templos románicos de referencia en Galicia. Datada no século XII, destaca pola súa espectacular ábsida semicircular, de gran valor arquitectónico e artístico, sostida por columnas exteriores e cunha coidada decoración en pedra. O templo conserva ademais elementos singulares como unha ventá de medio punto e un antigo reloxo de sol, un dos poucos que se manteñen en igrexas románicas da comarca.

A intervención permitirá mellorar a integración paisaxística da contorna, ordenar o espazo público situado fronte ao adro da igrexa, gañar zonas verdes, renovar pavimentos e facilitar a accesibilidade e o uso deste enclave por parte da veciñanza e das persoas visitantes.

Entre as actuacións previstas inclúense a reordenación do espazo fronte ao templo, a redución da explanada pavimentada para crear unha escala máis integrada coa contorna, a execución de pequenos muros de cachotaría de pedra que tamén funcionarán como bancos, a renovación dos pavimentos con pedra granítica e formigón desactivado, e a creación dun parterre con especies arbustivas.

Tamén se contempla a mellora visual do muro da ampliación do cemiterio mediante vexetación, a protección da mina de auga existente para evitar riscos de caída, a execución de canalizacións soterradas para servizos e a recolocación do panel informativo do monumento nunha zona máis axeitada próxima á entrada do adro.

Dende o Concello sublíñase que esta actuación respecta o carácter patrimonial e cultural da contorna e se limita a espazos públicos próximos á igrexa, seguindo criterios de integración paisaxística, mellora funcional e accesibilidade.

Con esta intervención, o Concello de Boborás continúa avanzando na recuperación e dignificación do seu patrimonio, neste caso nunha contorna de enorme valor vinculada á arquitectura relixiosa e tamén á arquitectura civil tradicional da parroquia de Cameixa.

O Concello agradece a colaboración da Xunta de Galicia, a través da Axencia de Turismo de Galicia, para facer posible esta actuación.

O Concello de Boborás informa da apertura das piscinas municipais o venres 19 de xuño, ás 13.00 horas.

A tempada permanecerá aberta ata o 31 de agosto, con horario de 13.00 h a 21.00 h, de luns a domingo.

Con motivo da apertura, a xornada será gratuíta e haberá colchonetas de auga para que os máis pequenos poidan gozar dun día especial de inicio do verán.

Para facer a reserva pode ser través de plataforma ou na taquilla física.

CADRO DE PREZOS:

Descarga a ordenanza de pago 20240606_Outros_ORDENANZA GALEGO-

Descarga o regulamento de uso 20240604_Outros_REGLAMENTO USO PISCINA MUNICIPAL DE BOBORÁS

Enlace para reserva e pago de entradas: https://adminv2.appgalileo.com/reservas_galileo/04c61602-bfac-4719-8e57-ef58281eaab3

O vindeiro 30 de maio de 2026, Pazos de Arenteiro volverá converterse nun escenario vivo da historia coa celebración dunha nova edición de “1809. A Batalla”, unha recreación histórica que lembra os feitos acontecidos durante a Guerra da Independencia, cando trescentos galegos liderados polo capitán Cachamuíña se enfrontaron ás tropas napoleónicas no contorno da Ponte da Cruz, convertendo o Ribeiro nun dos escenarios destacados do devir histórico europeo.

A xornada desenvolverase ao longo de todo o día, a partir das 11:00 horas, cun amplo programa de actividades para todos os públicos. Haberá visitas guiadas para coñecer a historia do pobo de Pazos de Arenteiro, apertura do recuncho infantil, mercado artesán, obradoiros de Artesanía de Galicia, campamento francés, animación musical, maxia familiar e diferentes recreacións teatralizadas polas rúas do pobo.

Durante a mañá poderanse vivir escenas como “A guerra paga a guerra” ou “Vive l’Empire”, ademais de propostas musicais e actividades para a cativada. Xa pola tarde, o programa continuará coa Hora do Xantar, a animación musical con Feitizo de Pau, novos obradoiros de Artesanía de Galicia, demostracións de loita de espadas e recreacións como “Barbeiro á forza”, “O pan é do pobo”, “O fusilamento de Don Xosé”, “O enfrontamento de Dona Hipólita” ou “Arenga de Xoana”.

O momento central da xornada chegará ás 20:30 horas coa representación de “A Gran Batalla. Ponte sobre o río Avia”, unha recreación teatralizada que volverá encher de emoción, historia e identidade un dos enclaves máis singulares do noso concello. Despois, a programación continuará con novas escenas teatralizadas, a hora da Cea e o concerto do grupo Feitizo de Pau, previsto para as 22:00 horas.

Desde o Concello de Boborás convidamos a toda a veciñanza e visitantes a achegarse a Pazos de Arenteiro para desfrutar dunha xornada única, na que patrimonio, cultura, historia, artesanía, música e tradición se unen nun marco incomparable.

A historia séntese. A historia vívese.
Pazos de Arenteiro agárdate o 30 de maio.

A continuación pódense consultar o cartaz oficial e o programa completo de actividades.

cartaza 1809 A Batalla 2026

programa 1809 A Batalla 2026

O subdelegado do Goberno en Ourense, Eladio Santos, visitou hoxe o Conxunto Histórico de Pazos de Arenteiro acompañado pola alcaldesa de Boborás, Patricia Torres, polos técnicos responsables da obra e pola empresa adxudicataria, coincidindo coa fase final dos traballos que se están a desenvolver neste enclave patrimonial de referencia.

A actuación forma parte do proxecto “Mellora da competitividade do Conxunto Histórico de Pazos de Arenteiro en Boborás”, financiado polo Goberno de España a través do Plan de Recuperación, Transformación e Resiliencia, con fondos da Unión Europea – NextGenerationEU.

O proxecto conta cun investimento total de 2.637.003 euros, financiado ao 100 %, e foi o único aprobado na provincia de Ourense, un dos catro seleccionados en Galicia e un dos 81 beneficiarios en todo o Estado dentro desta liña de axudas destinada á rehabilitación do patrimonio histórico con uso turístico.

Un dos factores determinantes para a concesión desta subvención foi a singularidade de Pazos de Arenteiro, o único conxunto histórico-artístico situado no rural da provincia de Ourense. Ademais, conta coa declaración de Ben de Interese Cultural (BIC), tanto no seu conxunto como na súa área de protección, unha condición esencial para optar a esta convocatoria destinada á recuperación e valorización do patrimonio histórico.

Tres grandes eixes de actuación

A intervención estrutúrase arredor de tres grandes liñas de traballo.

Rehabilitación dun inmoble municipal

O primeiro eixe contempla a rehabilitación dun inmoble municipal situado no núcleo histórico, que se converterá na futura Oficina de Difusión do Patrimonio de Boborás e da súa contorna. Este novo espazo permitirá reforzar a información turística, divulgar os recursos culturais e naturais do municipio e ofrecer un punto de referencia para visitantes e persoas interesadas no patrimonio local.

Mellora urbana e posta en valor da contorna

O segundo eixe céntrase na renovación urbana do conxunto histórico, mediante a mellora dos pavimentos, a eliminación de barreiras arquitectónicas, o soterramento do cableado aéreo e a retirada de elementos que afectan á imaxe e conservación das fachadas tradicionais.

Dentro desta actuación inclúese tamén a renovación do mobiliario urbano, incorporando elementos máis acordes coa identidade patrimonial e estética de Pazos de Arenteiro.

Eficiencia enerxética e iluminación patrimonial

O terceiro eixe está orientado á mellora da eficiencia enerxética do alumeado público. Para iso estanse substituíndo as luminarias existentes por tecnoloxía LED, renovando os centros de mando e reforzando a iluminación ornamental de elementos patrimoniais emblemáticos, como a igrexa de San Salvador e a ponte sobre o río Avia.

Un impulso para o patrimonio, o turismo e o desenvolvemento rural

Durante a visita, os representantes institucionais e os responsables técnicos puideron comprobar o avanzado estado dos traballos e os últimos detalles dunha intervención que permitirá mellorar a accesibilidade, incrementar a calidade do espazo público, reducir o consumo enerxético e consolidar o patrimonio histórico como motor de turismo sostible e desenvolvemento rural.

Esta actuación supón un importante paso adiante na protección, conservación e dinamización de Pazos de Arenteiro, declarado Conxunto Histórico no ano 1973, e contribúe a reforzar o papel de Boborás como municipio de referencia na recuperación e valorización do patrimonio rural galego.

Con este proxecto, avánzase nun modelo de desenvolvemento que combina conservación patrimonial, sustentabilidade, accesibilidade e dinamización turística, xerando novas oportunidades para o territorio e para a veciñanza.

O Concello de Boborás abre ás piscinas ó público o 20 de xuño de 2025, con acceso gratuito ese primeiro día, habendo colchonetas de auga para celebrar a apertura da tempada.

Os horarios será de 13.00 a 21.00 h con xornada intensiva, de luns a domingo.

Para facer a reserva pode ser través de plataforma ou na taquilla física.

CADRO DE PREZOS:

Descarga a ordenanza de pago 20240606_Outros_ORDENANZA GALEGO-

Descarga o regulamento de uso 20240604_Outros_REGLAMENTO USO PISCINA MUNICIPAL DE BOBORÁS

Enlace para reserva e pago de entradas: https://appreservas.com/reservas_galileo/6661744a4b09b0005fef6843

O Concello de Boborás foi proposto como beneficiario dunha axuda de 2.637.003 euros para o desenvolvemento do proxecto “Mellora da competitividade do Conxunto Histórico de Pazos de Arenteiro en Boborás (Ourense)”, no marco do Programa de mellora da competitividade e de dinamización do Patrimonio Histórico con uso turístico.

A actuación está financiada polo Ministerio de Industria e Turismo, a través do Plan de Recuperación, Transformación e Resiliencia, con fondos da Unión Europea – NextGenerationEU.

Esta proposta de financiamento supón un importante respaldo ao traballo desenvolvido polo Concello de Boborás para a protección, recuperación e posta en valor dun dos enclaves patrimoniais máis singulares do rural galego.

Un investimento íntegro para Pazos de Arenteiro

O proxecto conta cun orzamento financiable de 2.637.003 euros, cunha subvención proposta polo mesmo importe, o que permitirá avanzar nunha intervención integral sobre o Conxunto Histórico de Pazos de Arenteiro.

Pazos de Arenteiro é un enclave de referencia no patrimonio rural de Galicia, declarado Conxunto Histórico e cun valor singular pola súa arquitectura tradicional, o seu patrimonio relixioso e civil, a súa integración paisaxística e a súa vinculación coa historia, a cultura e o turismo sostible.

Tres grandes liñas de actuación

A intervención estrutúrase arredor de tres grandes eixes:

1. Rehabilitación dun edificio municipal como Oficina de Difusión do Patrimonio

O proxecto contempla a rehabilitación dun inmoble municipal situado no núcleo histórico, que se destinará á futura Oficina de Difusión do Patrimonio de Boborás e da súa contorna.

Este novo espazo permitirá reforzar a información turística, divulgar os recursos culturais e naturais do municipio e ofrecer un punto de referencia para visitantes, veciñanza e persoas interesadas no patrimonio local.

2. Rehabilitación e posta en valor da contorna

A principal partida do proxecto céntrase na rehabilitación e posta en valor da contorna, coa mellora dos espazos públicos do conxunto histórico.

As actuacións previstas permitirán mellorar a calidade urbana, a accesibilidade, a imaxe patrimonial e a integración dos elementos tradicionais, contribuíndo á conservación e valorización dun núcleo histórico único.

3. Mellora da eficiencia enerxética

O terceiro eixo está orientado á mellora da eficiencia enerxética, coa renovación do alumeado e a incorporación de solucións máis sostibles e respectuosas coa contorna.

Esta actuación permitirá reducir o consumo enerxético e mellorar a iluminación dun espazo de alto valor patrimonial, favorecendo ao mesmo tempo a seguridade, a accesibilidade e a experiencia das persoas visitantes.

Distribución do investimento

Segundo a proposta de resolución, o orzamento distribúese do seguinte xeito:

• Rehabilitación de edificio e adecuación como oficina de difusión do patrimonio: 344.644 euros.

• Rehabilitación e posta en valor da contorna: 1.829.399 euros.

• Asistencia técnica: 35.090 euros.

• Mellora da eficiencia enerxética: 427.870 euros.

En total, o proxecto acada os 2.637.003 euros de investimento.

Un impulso ao patrimonio, ao turismo e ao desenvolvemento rural

Esta actuación supón unha oportunidade histórica para Pazos de Arenteiro e para o conxunto do municipio de Boborás, ao permitir avanzar nun modelo de desenvolvemento baseado na conservación patrimonial, a sustentabilidade, a accesibilidade e a dinamización turística.

O proxecto permitirá mellorar a competitividade turística do Conxunto Histórico, reforzar a súa capacidade de acollida, poñer en valor os seus recursos culturais e naturais e xerar novas oportunidades para o territorio e para a veciñanza.

Desde o Concello de Boborás valórase esta proposta de financiamento como un paso decisivo para consolidar Pazos de Arenteiro como un referente do patrimonio rural galego, apostando por un turismo respectuoso coa identidade do lugar e coa súa historia.

Boborás segue avanzando así na recuperación e valorización do seu patrimonio, entendendo que a protección da nosa historia é tamén unha ferramenta de futuro para o desenvolvemento rural.

Boborás acolle este fin de semana unha nova edición da festa histórica “1809 A Batalla”

Pazos de Arenteiro celebra esta fin de semana unha cita festiva que lembra o acontecemento histórico que enfrontou aos galegos liderados por Cachamuíña contra o exército de Napoleón,  e que xa suma cinco edicións.

Na presentación desta mañá, o vicepresidente segundo César Fernández recoñeceu o “excelente traballo” da organización e do concello para desenvolver unha festa “xa referencial” e “á que sen dúbida merece a pena asistir, ademáis de indicar que “é unha das máis singulares pola súa celebración no Conxunto Histórico Artístico de Pazos de Arenteiro ademáis de pola súa temática”.

A alcaldesa de Boborás, Patricia Torres, remarcou a dedicación e esforzo dos organizadores para levar a cabo unha cita que “xa é unha referencia entre as festas históricas ourensás e galegas, precisando que é única polo componente do realismo que ofrecen as escenificacións con arma de avancarga que dispara pólvora”

Ourense, 10 de xullo de 2024.- Máis dun cento de veciños de Boborás e participantes procedentes de localidades de toda España recrearán esta fin de semana un dos acontecementos máis singulares da historia da provincia: a batalla de 1809, que enfrontou aos galegos liderados polo capitán Cachamuíña contra as tropas francesas de Napoleón.

A Deputación de Ourense e o Concello de Boborás colaboran con esta festa histórica, organizada pola Asociación Cultural A Batalla 1809, e na que os veciños de Boborás convidan aos visitantes a unha viaxe no tempo para coñecer durante dous días -sábado 13 e domingo 14 de xullo- en Pazos de Arenteiro os costumes, a gastronomía e o modo de vida daquela época, nunha ampla programación que culminará ás 13,30 horas do domingo coa batalla na ponte.

O vicepresidente segundo, César Fernández, participou esta mañá na sala de prensa do Centro Cultura “Marcos Valcárcel” na presentación do evento xunto á alcaldesa de Boborás, Patricia Torres, e a representante da Asociación Cultural A Batalla 1809, Elvira Santiago.

César Fernández definiu “1809 A Batalla” como “un evento xa fundamental no calendario da provincia”, antes de recoñecer o “excelente traballo” da organización e do concello para desenvolver unha festa “á que sen dúbida merece a pena asistir e desfrutar”.

Pola súa banda, Patricia Torres incidiu en convidar á xente a que veña “xa que A Batalla 1809 é unha festa totalmente diferente as outras, onde nos despertamos tal cual en 1809 e vivimos cada acontemento como se estivese ocurrindo de verdade, o que fai que o realismo sexa incrible, sumado a presencia de disparos e pólvora”, todo coas medidas de seguridade pertinentes. “Ë moi emocionante todo”, explica.

Elvira Santiago agradeceu a colaboración institucional, o traballo de todos os voluntarios e dos propios veciños de Pazos de Arenteiro para organizar unha cita “moi interesante e que se renova ano a ano, implementando novas actividades baixo o respecto ao espírito dunha festa que permite ver en directo a recreación desta batalla histórica, e que ademáis foise perfeccionando cos anos.

Un evento sociocultural con participación de veciños e visitantes

O programa de actividades da cuarta edición da festa “1809 A Batalla” inclúe ao longo do sábado 13 e domingo 14 de xullo visitas guiadas ao campamento francés e a Pazos de Arenteiro, música tradicional, concertos, exhibición de esgrima histórica, gastronomía, mercado, esceas teatralizadas….

A festa “1809 A Batalla” é un evento cultural no que se recreará a batalla librada entre os trescentos galegos liderados polo capitán Cachamuíña e os mil soldados do exército de Napoleón aos pés da Ponte da Cruz, aos que os galegos derrotaron. Os fitos históricos serán representados ao longo do fin de semana por voluntarios de todo Boborás xunto a participantes doutros puntos de Ourense e doutros puntos da xeografía española, que se unen á celebración e vístense de combatentes dos dous bandos durante eses dous días.

Descarga aquí o cartel da festa cartel 2024

Descarga aquí o progama da festa  Programa Festa 1809. A Batalla 2024

Descarga aquí o mapa da ubicación da festa mapa 1809. A Batalla

Este venres 5 de xaneiro, os Reis Magos visitarán todas as parroquias do Concello de Boborás, coas paradas que ahí se indican, pero durante o percorrido pasarán por todos os pobos como o ano pasado recollendo as vosas peticións e dándovos caramelos. 👑🤴🍭🍬
Ningún pobo quedará sen ser visitado!
Será grazas á colaboración da Agrupación Protección Civil de Boborás!