O Concello de Boborás impulsará a mellora da contorna da igrexa románica de San Martiño de Cameixa
O Concello de Boborás levará a cabo a primeira fase das actuacións de integración paisaxística, mellora funcional e accesibilidade na contorna da igrexa de San Martiño de Cameixa, no lugar de Morouzón, unha intervención que busca poñer en valor un dos espazos patrimoniais máis singulares do municipio.
A actuación desenvolverase ao abeiro dun convenio de colaboración entre a Axencia de Turismo de Galicia e o Concello de Boborás, cun orzamento de 129.979,77 euros e unha achega máxima de 117.000 euros por parte da Axencia de Turismo de Galicia.
Boborás é un dos concellos con maior riqueza patrimonial de Galicia, e esta intervención forma parte da liña de traballo municipal orientada á conservación, recuperación e posta en valor do patrimonio local, tanto para o desfrute da veciñanza como para reforzar o atractivo turístico do municipio.
A igrexa de San Martiño de Cameixa é un dos templos románicos de referencia en Galicia. Datada no século XII, destaca pola súa espectacular ábsida semicircular, de gran valor arquitectónico e artístico, sostida por columnas exteriores e cunha coidada decoración en pedra. O templo conserva ademais elementos singulares como unha ventá de medio punto e un antigo reloxo de sol, un dos poucos que se manteñen en igrexas románicas da comarca.
A intervención permitirá mellorar a integración paisaxística da contorna, ordenar o espazo público situado fronte ao adro da igrexa, gañar zonas verdes, renovar pavimentos e facilitar a accesibilidade e o uso deste enclave por parte da veciñanza e das persoas visitantes.
Entre as actuacións previstas inclúense a reordenación do espazo fronte ao templo, a redución da explanada pavimentada para crear unha escala máis integrada coa contorna, a execución de pequenos muros de cachotaría de pedra que tamén funcionarán como bancos, a renovación dos pavimentos con pedra granítica e formigón desactivado, e a creación dun parterre con especies arbustivas.
Tamén se contempla a mellora visual do muro da ampliación do cemiterio mediante vexetación, a protección da mina de auga existente para evitar riscos de caída, a execución de canalizacións soterradas para servizos e a recolocación do panel informativo do monumento nunha zona máis axeitada próxima á entrada do adro.
Dende o Concello sublíñase que esta actuación respecta o carácter patrimonial e cultural da contorna e se limita a espazos públicos próximos á igrexa, seguindo criterios de integración paisaxística, mellora funcional e accesibilidade.
Con esta intervención, o Concello de Boborás continúa avanzando na recuperación e dignificación do seu patrimonio, neste caso nunha contorna de enorme valor vinculada á arquitectura relixiosa e tamén á arquitectura civil tradicional da parroquia de Cameixa.
O Concello agradece a colaboración da Xunta de Galicia, a través da Axencia de Turismo de Galicia, para facer posible esta actuación.
