Category: cultura
Campamento de Verán 2018

Como tódolos anos o Concello de Boborás pon en marcha o seu campamento de verán, que ademais comeza nada máis rematar o cole e acaba o venres anterior ao comezo deste. Trátase dunha pequena axuda á conciliación das familias e para que os nenos e as nenas pasen un verán divertido e cheo de actividades. Tamén sabemos que é importante que os nenos e as nenas descansen, e pasen tempo coas familias, e neste sentido invitamoslas tamén a que aproveiten este periodo vacacional para estar cos pequenos e pequenas da casa.

Os nenos e as nenas que están no cole levarán nestos días a ficha na mochila, mentres que os demáis poderán facer a inscrición no propio Concello.

O campamento é para nenos e nenas empadroados/as, escolarizados/as en Boborás e aqueles/as que pasen as súas vacacións nas casas dos seus familiares neste municipio.

Podedes descargar as fichas de inscrición aquí:

FICHACAMPAMENTO

DEREITOS DE IMAXE (1)

RECOLLIDA (1)

 

 

Para máis información chamar ao teléfono 988402008.

Luis Axeitos e Xosé Benito Reza, gañadores do Antón Losada Diéguez 2017

ACTA DO FALLO DO XXXIII EDICIÓN DO PREMIO ANTÓN LOSADA DIÉGUEZ

 

Na casa do Concello de Boborás, sendo as once horas e once minutos do día vinteoito de abril de 2018, reúnese segundo o previsto nas Bases o Xurado para fallalo PREMIO ANTÓN LOSADA DIÉGUEZ na súa XXXIII EDICIÓN, composto polos seguintes membros.

 

PRESIDENTA:

– Dona Ana Patricia Torres Madureira, concelleira de Cultura de Boborás

VOGAIS:

– D. Diego Fernández Nogueira, concelleiro de Cultura do Concello do Carballiño

– D.  Manuel Doval Soto, deputado de Cultura da Deputación de Ourense

– Dona María Xesús Pato Díaz, representante da Real Academia Galega

– D. Francisco Calo Lourido, representante do Museo do Pobo Galego

– D. Pegerto Fernández Saavedra, representante do Concello da Cultura Galega

– Dona María Teresa López Fernández, representante da Universidade da Coruña

– D. Xosé Manuel Salgado Rodríguez, representante da Universidade de Santiago de Compostela

 

SECRETARIO:

  • Jorge Moreno Martín-Caloto, secretario do Concello de Boborás.

NON ASISTE:

  • Xosé Henrique Costas González, represente da Universidade de Vigo.

 

 

Despois do saúdo aos membros do xurado por parte da Concelleira de Cultura do Concello de Boborás, presidenta do xurado, declarase aberta a sesión.

Seguidamente procedese polo xurado a deliberar sobre as obras presentadas e admitidas segundos as bases, separando as de Creación Literaria e as de Investigación e Ensaio.

INVESTIGACIÓN E ENSAIO

Polos membros do xurado analízanse unha e cada unha das obras que se incluíron no campo de investigación e ensaio.

O xurado, despois dun intenso debate dada a calidade das obras presentadas decidiu por maioría conceder o premio a seguinte obra:

“MANUEL ANTONIO. UNHA VIDA DE REBELDÍA”

AUTOR: XOSÉ LUIS AXEITOS

EDITORIAL: XERAIS

 

Xustificación:

“Unha achega moi ben definida: á vida do poeta rianxeiro, analizada por un investigador de grande altura que leva moitos anos dedicado a desvelar o misterio do autor recoñecido dende sempre, pero non sempre ben coñecido. Con este libro o profesor Axeitos culmina o seu proxecto de presentarnos a Manuel Antonio, o poeta vangardista e o cidadán liberado de convencionalismo, tal cal foi, sempre á procura da liberdade.

É o ramo a edición completa da obra de Manuel Antonio. Un traballo filolóxico monumental. Extraordinario traballo de investigación nos diversos campos e no que prima o selo contrastado sobre calquera especulación.

Achega unha extraordinaria información sobre o autor, familia, contexto, formación, escola de náutica e navegación, participación política e literaria, enfermidade…

Unha visión significativa e nova sobre Manuel Antonio.”

 

 

 

 

CREACIÓN LITERARIA

Polos membros do xurado analízanse unha e cada unha das obras que se incluíron no campo de Creación Literaria.

O xurado, despois dun intenso debate dada a calidade das obras presentadas decidiu por maioría conceder o premio a seguinte obra:

 

“TERRADENTRO”

Autor: Xosé Benito Reza

Editorial: Xerais

Xustificación:

“Esta obra, escrita nun galego de grande riqueza, e cunha firme raíz, ou variante lingüística ourensá, achéganos a un mundo a piques de desaparecer, con personaxes moi ben trabados e construídos, especialmente o avogado da vila, un arquetipo de Galicia interior que, por diversas circunstancias,  vai ter que se enfrontar a tres misteriosos asuntos: A morte violenta dun vedraio fidalgo na súa casa, a busca da fronteira dos tesouros do que falan as lendas, tesouros soterrados dos mouros e unha inesperada aparición que conmociona a vila: a cadela do alcalde un bo día aparece pintada de verde.

A perda do equilibrio e da perfecta simbiose do pasado, xunto coa recreación e a evocación da paisaxe determinan un ritmo áxil e atractivo. En definitiva, Terradentro recolle o mellor da narrativa galega do pasado, en concreto a descrición dos lugares e dos accidentes xeográficos, introducindo novidosos elementos de avangarda que fan da novela o retrato literaturizado da realidade da Galicia interior.”

Non habendo máis asuntos dos que tratar, levantase a sesión da orde da presidencia sendo as doce horas e cincuenta e cinco minutos do expresado día do que o secretario certifica.

 

A entrega do premio será o vindeiro 9 de xuño, en Moldes.

ENTROIDO CONCELLO DE BOBORÁS 2018

O Concello de Boborás terá o 10 de febreiro a partir das 19.00 hora unha gran festa na praza ubicada detrás do concello, que estará amenizada polo grupo IMPERIO. Ademais para todos os asistentes haberá chocolate con churros, e para os máis pequenos hinchable, obradoiro de maquillaxe e agasallos.

O luns 12 de febreiro correranse os Rodos en Pazos de Arenteiro. O punto de encontro será o bar A Ponte ás 21.30 horas. O remata haberá uns pinchos gratuítos para os asistentes, así que preparade os vosos rodos.

 

Animadevos a participar. Totalmente gratuíto.

 

Máis información: cultura@boboras.gal ou 988402008.

O Nadal en Boborás!!!!

Ei que chega o Nadal a Boborás!!! Vamos a recibilo con moitas actividades para os nenos e nenas, e algúns máis grandes.

O 21 actuará o mago Le Grande Martin no cole de Boborás e logo os nenos do centro recibirán a visita de Papa Noel.

Os días 22/26/27/28 e 29 de decembro haberá campamento de Nadal de 9.00 a 14.30 horas ao igual que os días 2/3/4 e 5 de xaneiro de 2018.

O 27 de decembro visitaremos Pazolandia.

O 5 de xaneiro virán as súas maxestades os Tres Reis Magos de Oriente a visitar o Fogar Residencial Blanco Amor de Brués ás 10.30 horas e as 12.00 estarán no salón de Plenos do Concello para escoitar as peticións dos máis cativos do noso concello.

 

VI edición do “Xoguete Solidario”

Como todolos anos o Concello de Boborás organiza a campaña de recollida de xoguetes para entregar nestas datas de Nadal as familias con menos recursos do municipio e con cativos ao seu cargo. Calquer momento do ano é bo para ser solidario, pero neste caso ainda máis se cabe. Por iso se tes xoguetes, libros, xogos de mesas… que xa non uses e que presenten bo estado podes entregalos ata o 19 de decembro no Concello de Boborás, no Cole de Boborás ou na consulta do Pediatra José Villanueva do Carballiño.

Para máis información: 988 402 008

 

Axudas para material escolar do Concello de Boborás

O Concello de Boborás abre o prazo de solicitude das axudas de material escolar ata o 04/12/2017. A continuación veñen detalladas as bases reguladoras, para calquera dúbida pode consultar nas oficinas do concello ou no teléfono de contacto 988 402 008.

PREME EN SOLICITUDE PARA OBTER OS FORMULARIOS:

SOLICITUDE

Bases reguladoras que rexerán a convocatoria das axudas para adquisición de material escolar do alumnado de educación infantil, primaria e secundaria para o curso académico 2017/18.

 

PRIMEIRA: Obxecto da convocatoria.

As axudas convocadas mediante as presentes bases, teñen como obxecto o cofinanciamento de material escolar dos alumnos que cursen educación infantil, primaria e secundaria.

Concíbense como un apoio ás familias empadroadas no Concello de Boborás con dificultades socioeconómicas que dificulten a correcta escolarización dos alumnos.

 

SEGUNDA: Orzamento.

O orzamento dispoñible para a concesión das axudas, ascende á cantidade de 1.166,66 €. No caso de que a demanda supere o orzamento dispoñible, priorizarase a concesión segundo a puntuación obtida despois da correspondente baremación, ata esgotar o orzamento.

 

TERCEIRA: Beneficiarios.

Poderán ser beneficiarias as familias que cumplan os seguintes requisitos:

  1. Estar empadroados todos os membros da unidade familiar (pai e/ou nai e fillo para o que se solicitan as axudas) no Concello de Boborás.
  2. Ter fillos matriculados para o curso escolar 2017/18 en educación infantil, primaria ou secundaria. No caso de educación infantil e primaria, será requisito indispensable que se atopen matriculados no CEIP Nosa Señora de Xuvencos, exceptuando ós alumnos dos lugares de Astureses que  teñen asignados os centros educativos de O Carballiño.
  3. Que a renda per cápita anual non supere uns ingresos netos de 6.000 €. Computaranse os ingresos de todos os membros da unidade familiar. A estes efectos, enténdese por unidade familiar os pais dos menores escolarizados así como todos os descendentes e ascendentes que convivan no mesmo domicilio.

Para os efectos desta orde, a renda per cápita da unidade familiar é o resultado de dividir a renda da unidade familiar do exercicio fiscal 2016 entre o número de membros computables, tendo en conta que computarán por dous os membros que acrediten unha discapacidade igual ou superior ao 33 % ou a percepción dunha pensión da Seguridade Social por incapacidade permanente nos graos de total, absoluta ou grande invalidez, ou a equivalente de clases pasivas.

A renda neta per càpita familiar obterase como resultado de realizar os seguintes cálculos en base á declaración da renda do exercicio 2016:

– Sumarase a base impoñible xeral coa base impoñible de aforro.

– Deste resultado restarase a cota líquida resultante da autoliquidación.

Segundo isto, a renda familiar para os efectos da autodeclaración é o resultado de facer as seguintes operacións coa declaración do IRPF:

casiña 392+ casiña 405-casiña 537

O resultado obtido dividirase polo número de membros que forman parte da unidade familiar.

O concepto de unidade familiar será o definido na normativa do IRPF.

Se solicitado o borrador na AEAT esta unicamente comunica os datos fiscais, e polo tanto non o remite, para determinar a renda dos  membros computables que obteñan ingresos propios seguirase o procedemento descrito no punto primeiro e do resultado restaranse os gastos deducibles e as retencións ou pagamentos á conta efectuados.

 

Aclaracións para determinar correctamente a renda anual familiar

– Para determinar a renda anual familiar hai que sumar as rendas obtidas por todas as persoas que integran a unidade familiar. Nesta operación poden presentarse varias situacións:

-Unidades familiares nas que ambos cónxuxes, ou calquera outro integrante dela, perciben rendas e teñen obriga de presentar a declaración anual do IRPF. Neste caso, o importe da renda familiar resultará das sumas e restas das casiñas indicadas, que se obterán de cada declaración, se foron presentadas individualmente- que é o habitual- ou ben, da declaración conxunta.

-Unidades familiares nas que ambos cónxuxes , ou calquera outro integrantes perciben rendas pero só un deles ten a obriga de presentar a declaración. Neste caso, a obtención do importe da renda familiar resultará das sumas e restas das casiñas indicadas, para o membro da unidade que presentase declaración do IRPF máis importe que resulte, para o outro integrante da unidade familiar, dos datos do borrador doo IRPF agás os datos que figuren na casiña 537 correspondente á cota resultante da autoliquidación, dado que o contribuinte non presentou a declaración polo IRPF. No caso de que un dos membros en vez de borrador dispoña dun certificado de imputación de rendas, para realizar o cálculo dos seus ingresos deberá sumar os rendementos íntegros e restar os gastos deducibles e as retencións ou pagamentos a conta efectuados.

-Cando ambos cónxuxes perciban rendas pero non teñan obriga de presentar declaración da renda ou ben cando o cónxuxe ou os cónxuxes non perciban renda ningunha suxeita á tributación no IRPF. Nestes supostos ,os interesados deberán consignar os datos do borrador do IRPF ou no seu caso os datos que figuren no certificado de imputación de rendas do mesmo xeito que no apartado anterior.

  1. A renda da unidade familiar será o resultado de sumar as rendas de cada un dos membros computables da familia que obteñan ingresos de calquera natureza, de conformidade coa normativa reguladora do imposto sobre a renda das persoas físicas.

 

  1. Nos casos de violencia de xénero non se terán en conta os ingresos do agresor para determinar a renda per cápita da unidade familiar.

 

CUARTA: Contía das axudas.

  • Alumnos de infantil: 70 euros por beneficiario
  • Alumnos de primaria: 90 euros por beneficiario
  • Alumnos de secundaria: 110 euros por beneficiario

 

Estas axudas serán incompatibles con calquera outra axuda solicitada para o mesmo concepto (material escolar en outras Administracións).

 

QUINTA: Solicitude e documentación.

As solicitudes presentaranse no Rexistro xeral do Concello de Boborás ou segundo o establecido no artigo 16 da ley 39/2015, do procedemento administrativo común das Administracións Públicas.

Acompañaranse da seguinte documentación:

  1. Fotocopia do DNI do/a solicitante, pasaporte ou NIE.
  2. Fotocopia do Libro de Familia.
  3. Certificado de convivencia.
  4. Acreditación da situación económica e laboral de todos os membros da unidade de convivencia: declaración da renda do 2016. No caso de non estar obrigado a presentala, requerirase o certificado negativo de Facenda e os xustificantes que acrediten os ingresos (certificado do INEM sobre as prestacións de desemprego, certificado de pensións, convenio regulador, de ser o caso, ou calquera outro documento que acredite ingresos). De non poder acreditar documentalmente a situación económica, será preciso a presentación de Declaración xurada.
  5. Informe de vida laboral para os membros da unidade familiar en idade laboral.
  6. Tarxeta de demandante de emprego, de ser o caso.
  7. Fotocopia do certificado do grao de discapacidade e/ou valoración de dependencia, de ser o caso.
  8. Certificado do centro educativo que acredite a matrícula e o nivel escolar que cursa o alumno.
  9. Certificado do número de conta.
  10. Facturas acreditativas do gasto en material escolar no caso de que éste xa fose realizado.

 

SEXTA:TRIBUNAL DE VALORACIÓN

Será designado polo alcalde e terá a seguinte composición:

– Presidente: A traballadora social do Concello.

-Secretario: Un funcionario   da Corporación, persoal laboral fixo da Corporación , habilitado de carácter nacional.ou da Deputación de Ourense designados pola Alcaldía.

-3 vogais: funcionarios ou traballadores do Concello,ou habilitado de carácter nacional. ou da Deputación de Ourense designados pola Alcaldía.

 

SÉTIMA: Procedemento.

Unha vez presentadas as solicitudes no Rexistro Xeral do Concello ou por calquera outro medio recollido no artigo 16 da ley 39/2015, do procedemento administrativo común das Administracións Públicas, procederase á valoración por parte do Tribunal  da documentación presentada e a posterior baremación para establecer unha orde de prioridade, no caso de que sexa preciso. De existir expedientes coa mesma puntuación e esgotar o crédito dispoñible, terá prioridade o que posúa unha menor renda.

O órgano competente para a instrucción será a Concelleira de Cultura.

O órgano competente para resolver a concesión ou denegación será o Alcalde-presidente, en base á proposta do Tribunal de Valoración unha vez realizada a avaliación e baremación.

Comunicarase a resolución á persoa interesada no prazo dunha semana.

 

OITAVA: Criterios de avaliación e baremo.

Teránse en conta os seguintes factores para determinar unha puntuación segundo o maior grao de necesidade:

  1. Situación socioeconómica:
  • Familia na que o sustentador principal se atope en situación de desemprego: 5puntos.
  • Familia numerosa: 5puntos.
  • Familia monoparental: 3puntos.
  • Familia na que algún membro teña recoñecido o grao de discapacidade e/ou valoración de dependencia: 3puntos.
  • Familia na que o sustentador principal sexa víctima de violencia de xénero: 5puntos.
  1. Factores sociais:
  • Familia incluída no Programa de Educación Familiar: 5puntos.
  • Familia beneficiaria de RISGA: 5 puntos.

 

NOVENA: Prazo de presentación de solicitudes.

O prazo será de un mes a partir do día seguinte á súa publicación no Boletín Oficial da Provincia de Ourense.

 

DÉCIMA: Xustificación e pago das axudas.

Procederase ó pago da axuda concedida unha vez sexa presentada a factura ou facturas oficiais correspondentes ós gastos en material escolar. A data límite para a presentación de facturas será o 15 de decembro de 2017.

 

Boborás sinaliza parte dos recursos turísticos do concello

O Concello de Boborás colocou un total de 89 elementos de sinalización turística que facilitan información na metade do municipio. Trátase dunha primeira fase cunha inversión de 52.223 euros, dos que Turismo aporta o 80% e o Concello o 20% restante, e que terá continuidade noutra anualidade ata completar todo o territorio. A portavoz do grupo de goberno, Patricia Torres, declaraba que con estas señais persiguese poñer en valor os recursos patrimoniais e naturais, facilitando información aos turistas, e o mesmo tempo orientando as súas visitas aos lugares de interese, en moitos casos dende a N-541, que era algo que viñan demandando, fundamentalmente os clientes das cincos casas de turismo rural dispoñibles.

Sete destas señais son atrís interpretativos e xa están instalados en Pazos de Arenteiro, Ponte do Santo Sepulcro, Igrexa de San Xoan de Laxas, Igrexa de San Martiño de Cameixa, Igrexa de San Mamede de Moldes, Igrexa de Santa María de Xuvencos e no Castro de Xurenzás.

Ademais, instalaronse 12 señais de madeira, 69 metálicas e un plano detallado na Almuzara para poder realizar as visitas sen guía.

Para a execución deste proxecto, o Concello contou coas autorizacións favorables da Deputación, Medio Ambiente, do Ministerio de Fomento e tamén de Patrimonio, que esixiu que a información contida fose facilitada por historiadores, para o que se contou cos membros do Centro de Estudios Chamoso Lamas, que habitualmente colaboran co Concello con as como os “Roteiros Culturais polas parroquias”.

Desta forma, en cada igrexa aportase a información histórica e sobre a súa estrutura e arte, e tamén camiños reais e castros. A aldea de Pazos de Arentiero, declarada Conxunto Histórico- Artístico ca categoría de Monumento Nacional dende 1973 , é outro dos lugares sinalizados, ademáis de Moldes, Cameixa, Laxas, Almuzara e Brués.

15º Roteiro Cultural: Molín, un ano despois

O Concello de Boborás continúa co programa de Roteiros Culturais para este 2017, co apoio económico da Deputación de Ourense e a través do Centro de Estudio Chamoso Lamas, e para rematar o programa para este ano toca o 5 de novembro a visita a Molín, na que ademais de ver o seu rico patrimonio arqueolóxico e mineiros veremos como se recupera tralo incendio que sufrio en setembro de 2016.

Os/as interesados/as deberán de estar ás 9.30 horas no punto de encontro, neste caso é a Igrexa de Brués.  É importanteg levar calzado cómodo, auga e algunha froita.

Duración aproximada: 4 horas.

Abride ben os ollos, e descubride os tesouros do noso Concello!!

14º Roteiro Cultural: Parroquia de Astureses

O Concello de Boborás continúa co programa de Roteiros Culturais para este 2017, co apoio económico da Deputación de Ourense e a través do Centro de Estudio Chamoso Lamas, e para seguir este mes de outubro a parroquia a visitar é a de Astureses o día 15.

Os/as interesados/as deberán de estar ás 9.30 horas no punto de encontro, neste caso é a Capela da Saleta..  É importante levar calzado cómodo, auga e algunha froita.

Duración aproximada: 4 horas.

 

Abride ben os ollos, e descubride os tesouros do noso Concello!!

 

Outono Xoven
Novas actividades agora que comeza o outono!! II Xornadas Micolóxicas que se farán no Concello de Boborás con saídas ao monte. Curso de fotografía de Outono, vamos a sacar a cámara e aprender a mellor maneira de fotografar eses escenarios e paisaxes tan bucólicos cas cores tan características desta estación do ano. E para rematar faremos un curso de fotografía nocturna no lugar da Fenteira, espazo no que poderemos observa o ceo en todo o seu esplendor. Anímate a participar. Son actividades gratuítas e financiadas pola Dirección Xeral de Xuventude, Voluntario e Participación da Consellería de Política Social.
Máis información no 988402008 e no correo cultura@boboras.org!!
Emprende Xoven: Obradoiro de búsqueda de emprego e orientación laboral

O Concello de Boborás organiza para os días 2 e 3 de outubro de 16.00 a 19.00 h un obradoiro de búsqueda de emprego e orientación laboral a través do Dirección Xeral de Xuventude, Participación e Voluntariado da Consellería de Política Social. Obradoiro con carácter gratuíto. Entre outros temas aprenderase a facer o curriculum e daranse claves para a búsqueda activa de traballo, claves nas entrevistas….

Anótate no 988402008 ou no correo electrónico cultura@boboras.org